Þjónustuskilmálar socialPost
Gildir frá 1. september 2026. Síðast uppfært 4. september 2026.
1. Þjónustan
OÞ ehf., kt. 671113-1520, sem starfar undir heitinu OT AI, veitir þjónustuna socialPost. Þar sem stendur „OT AI" í þessum skilmálum er átt við OÞ ehf. socialPost er stafrænn starfsmaður sem tekur við tölvupósti frá viðskiptavini, útbýr drög að færslu fyrir Facebook og Instagram í samræmi við skráð einkenni viðskiptavinarins, sendir drögin til samþykktar, og birtir þau á þeim samfélagsmiðlareikningum sem viðskiptavinurinn á sjálfur.
Engin færsla birtist án þess að einhver hjá viðskiptavininum samþykki hana. Þetta er fastur hluti þjónustunnar og verður ekki tekið úr sambandi.
Þessir skilmálar gilda samhliða þeim þjónustusamningi og vinnslusamningi sem viðskiptavinurinn samþykkir eða undirritar. Ef á milli ber gengur þjónustusamningurinn framar.
2. Ábyrgð viðskiptavinar
Viðskiptavinurinn ber ábyrgð á því efni sem hann sendir inn og því sem hann samþykkir til birtingar. Nánar tiltekið:
- Hann á eða hefur heimild til að nota allan texta og allar myndir sem hann sendir, þar með talið höfundarétt og birtingarrétt á myndum af fólki.
- Efnið er rétt, ekki villandi, og í samræmi við íslensk lög, þar á meðal lög um fasteignaviðskipti og lög um eftirlit með viðskiptaháttum og markaðssetningu.
- Efnið stenst skilmála Meta um efni og auglýsingar.
- Hann á þá Facebook-síðu og þann Instagram-reikning sem birt er á, eða hefur skriflega heimild eiganda.
- Hann heldur starfsmannaskránni réttri og lætur okkur vita þegar starfsmaður hættir.
- Hann gætir aðgangs að stjórnborðinu og deilir honum ekki með óviðkomandi.
Drögin eru samin af gervigreind. Þau geta innihaldið villur. Sá sem samþykkir ber ábyrgð á að lesa þau yfir. Samþykki telst staðfesting á að efnið sé rétt.
3. Það sem OT AI ábyrgist
Við leggjum okkur fram um að þjónustan sé aðgengileg og að hún birti það sem samþykkt var, óbreytt. Við ábyrgjumst ekki samfellda keyrslu án truflana.
4. Takmörkun ábyrgðar
OT AI ber ekki ábyrgð á:
- rekstrartruflunum, breytingum eða lokunum hjá Meta eða öðrum þriðju aðilum
- því að reikningur viðskiptavinarins sé takmarkaður eða lokaður af Meta
- efni sem viðskiptavinurinn hefur sjálfur samþykkt til birtingar
- óbeinu tjóni, þar með töldu tapi á viðskiptum, tekjum, orðspori eða gögnum
Heildarábyrgð OT AI vegna beins tjóns sem rekja má til þjónustunnar takmarkast við þá fjárhæð sem viðskiptavinurinn greiddi raunverulega fyrir þjónustuna síðustu þrjá mánuði áður en bótaskylt atvik átti sér stað.
Þessi takmörkun á ekki við um ásetning eða stórfellt gáleysi, né um ábyrgð sem ekki má takmarka að lögum.
5. Réttur til að stöðva þjónustu eða loka aðgangi
OT AI getur stöðvað þjónustuna eða lokað aðgangi, að hluta eða öllu leyti, ef:
- viðskiptavinurinn brýtur þessa skilmála eða þjónustusamninginn
- greiðsla er í vanskilum
- efni sem sent er inn er ólöglegt eða brýtur skilmála Meta
- Meta krefst þess, eða lokar aðgangi okkar
- notkun ógnar öryggi eða rekstri þjónustunnar
Við tilkynnum viðskiptavininum um stöðvun með fyrirvara þar sem því verður við komið. Þar sem lög eða skilmálar Meta krefjast tafarlausra aðgerða getur stöðvun orðið án fyrirvara.
Viðskiptavinurinn getur sagt þjónustunni upp samkvæmt þjónustusamningnum. Við eyðum gögnum hans samkvæmt persónuverndarstefnunni.
6. Hugverkaréttindi
Viðskiptavinurinn á áfram það efni sem hann sendir inn og þær færslur sem birtar eru. OT AI á þjónustuna sjálfa, hugbúnaðinn og aðferðirnar að baki henni.
7. Breytingar á skilmálum
Við getum breytt þessum skilmálum. Við tilkynnum breytingar í tölvupósti með 30 daga fyrirvara. Ef viðskiptavinurinn heldur áfram að nota þjónustuna eftir að breytingin tekur gildi telst hann hafa samþykkt hana.
8. Ágreiningsmál
Um skilmálana gilda íslensk lög. Rísi ágreiningur reyna aðilar fyrst að leysa hann með viðræðum innan 30 daga. Takist það ekki skal málið rekið fyrir Héraðsdómi Reykjavíkur.
9. Samband
OÞ ehf. (OT AI) · otai@otai.is · Byggakri 3, 210 Garðabær